الولد و البنت

الولد او الراجل ليه الحق انه يلبس اللي هو عايزه, يعمل شعره زي ما هو عايز, يلبس قصير او يلبس طويل, يحط برفان او بودي سبراي (او يفضل معفن في اغلب الاحوال خصوصا لو كان بيركب المترو) المهم القصد هنا ان الولد من حقه يلبس اللي هو عايزه و ينزل الشارع يلفت نظر البنات و يعلق دي و يعاكس دي و محدش يقوله بتعمل ايه.. و مطلوب من البنات انها تبقي محترمة (مع انها اكيد عندها مشاعر و اكيد زيها زي الولاد بتشوف ولد حلو او جذاب او بتشتهي ولاد برده) لكن لما العكس بيحصل بتبقي البنت هي اللي غلطانة طبعا. مش مطلوب منها تلبس اللي هي عايزاه او شكلها يبقي زي ماهي عايزاه و لو عملت كدة تبقي قليلة الادب و ماشية علي حل شعرها و بتاعت ولاد...الخ.

الغرض في الكلام مش الدفاع عن البنات و حقوق المسواه لاني مش مقتنع بالمسواه (كلمة المسواه بتدل ان في حاجتين مختلفين و احنا بنساوي بنهم و انا مش شايف اختلاف اصلا) اكتر ماهو شكوي عن المجتمع المريض اللي احنا عايشين فيه ده.

الولد من حقه انه يخلع التي شيرت عادي لكن البنت لا.. طيب لو فرضنا (لاني مش متأكد) ان الموضوع هو هو عند البنات زي ماهو عند الولاد يبقي ايه الوضع؟ احنا ناس مريضة فعلا. ناس متناقضة زي ما قلت.

Comments

  1. تأميما على كلامك....البنت المفروض تلبس واسع و تغطى شعرها على اساس ان كل ده عوره..ان ده بيستفز جنابه
    ياسلام !!!
    طب ما الولد مش ملتزم بحجابه..اه..المفروض البنطلون يبقى واسع..و لو هيلبس سكينى يلبس عليه تى شيرت طويل فوق الركبه
    بلذمه ينفع ؟! ينفع اقعد اللبس سعادتك على مزاجى..و اعمل حلقات من برامج تتكلم عن لبسك..تقبلها دى ؟!

    بس ارجع و اقوللك برضه دى مشكله طبقه معينه..المتوسطه و اللى تحتها..فى بلد فقيره زى زفته مصر

    لكن معتقدش ان اللى على قمه الهرم الطبقى..ال 20% بتوع ال80 % من الثروه بينتبهوا للمواضيع دى
    (اعتقد) ان مطلوب البنت تكون حلوه و مثيره كمان..و الولد كذلك

    ReplyDelete
    Replies
    1. هو الموضوع كله مش منطبق علي اللبس بس. فكرة ان الولد يعمل اللي هو عايزه علشان هو ول و البنت ماتعملش حاجة علشان هي بنت. فين الفكرة؟ ليه باخد حق من دي و اديه لده؟ الاسرة لو فيها ولد و بنت في نفس السن او قريبين و الولد مصاحب و بيخرج و بيسهر معاها و بتجبله هدايا و الخ و باباه و مامته عارفين بيبقوا عادي جدا و بيساعدوه كمان لكن لو البنت يبقي لا و عيب و حرام و مايصحش...طيب ما اللي مايصحش ده سايبه ليه يحصل مع ابنك و البنت اللي مصاحبها؟ يقولك انا ماليش دعوة ببنات الناس. طيب الولد اللي بيكبر يلاقي انه ليه الحق يعمل اللي هو عايزه و اخته لا علشان هي بنت.. هاتبقي نظرته للبنات ازاي؟

      الـ20% اللي انتي بتقولي عليهم دول الفكرة عندهم ان الموضوع عادي و زي ما بتقولي لازم يبقوا (سواء الولد او البنت) حلويين. ايه علاقة ده بالفلوس؟ يمكن علشان المبادئ بتتغير بالفلوس؟

      انا معاكي انه في الطبقة المتوسطة لكن اللي تحتيها لا.. اللي تحتيها بحس انهم بيهتموا اكتر بالمظاهر اكتر من الحقيقة... يعني البنت تلبس اللي هي عايزاه.. بس بعيد عن المنطقة اللي هي ساكنة فيها. يبقي اهلها عارفين انها مع واحد و يبقوا عاملين مش عارفين. مش كلهم طبعا بس ده اللي بحسه.

      Delete

Post a Comment

Popular posts from this blog

تخيلات - عبيد

لو كنت تعرفني بجد