لو نازل تضرب ظابط او عسكري علشان بيدخل الدخلية علشان يتنطط علي الناس.. يبقي مفرقتش حاجة عنه.
لو نازل تسرقلك مدرسة ولا محل خمرة او تكسر كباريه.. يبقي مفرقتش عن اللي بيسرقوك و بيسرقوا عيالك و بلدك.
لو نازل تظيط و تتنطط و انت مش عارف انت عايز ايه اصلا.. يبقي مفرقتش حاجة عن الجيل اللي وصلنا لكدة.
لو نازل تستنكر و تشجن و تنادي بكام كلمة.. يبقي مفرقتش حاجة عن حكامنا العرب.
لو نازل تدور علي حد ترمي عليه المسئولية و تتهمه في اي حاجة و كل حاجة.. يبقي مفرقتش حاجة عن حكومتنا المصونة علي مر التاريخ.
لو نازل ترمي طوبة في الزحمة.. او تلمس صدر واحدة.. يبقي مفرقتش.
لو نازل تهتف باسقاط مرسي و انت مش عارف ايه الحل بعد كدة.. يبقي مفرقتش.
لو نازل تفرح بحكم محكمة علي مصريين قتلوا مصريين.. يبقي مفرقتش.
لو نازل تعادي في محافظة او مدينة او فصيل سياسي.. يبقي مفرقتش.
لو نازل علشان “تجيب حقك”.. لو بتبدي مصلحتك علي مصلحة غيرك و مصلحة بلدك و ارضك و شعبك.. يبقي مفرقتش.
لو نازل علشان بتكره الاسلاميين و انهم بيتكلموا باسم الدين فلازم تطلع ميتينهم.. يبقي مفرقتش حاجة عنهم.
لو نازل فاكر ان خلافك كله مع الداخلية او العسكر و نازل تضربهم.. يبقي مفرقتش.
لو كرهت فلسطين علشان حماس بعتت مسلحيين.. يبقي مفرقتش.
لو بتكره امريكا علشان بتدور علي مصلحتها.. يبقي مفرقتش.
لو بتكره اسرائيل و بتحب عمرو موسي.. يبقي مفرقتش.
لو بتدور علي حد غيرك تكره علشان تشيله الليلة.. يبقي مفرقتش.
لو بتدافع عن الاخوان و همك عليهم و مش علي بلدك.. يبقي مفرقتش.
لو بتدافع عن الثوار و فاكرهم كلهم ملايكة.. تبقي مفرقتش.
لو بتدخل في نقاشات علشان تثبت ان اللي ماتوا في بورسعيد في الاستاد شهداء و لا لا.. يبقي مفرقتش.
لو بتغير حقايق و تغمض عينيك عنها علشان تدافع عن الثوار.. يبقي مفرقتش.
لو بتبرر عمال علي بطال للاخوان علشان فاكرهم بتوع دين و بتوع ربنا.. يبقي مفرقتش.
لو شايف مرسي بطل.. لو عايز البرادعي سوبر مان.. لو بتحب حمدين علشان واحد مننا.. لو مستني حد يبقي الفاتح العظيم.. يبقي مفرقتش.
لو فاكر ان الثورة فوضي يبقي مفرقتش.
لو فاكر الثورات سلمية يبقي مفرقتش.
لو شايف ان العدد من غير تنظيم هايجيب اي نتيجة.. يبقي مفرقتش.
لو هاتقطع طريق علشان توصل صوتك و تقول طظ في الباقي.. لو عايز تعدي في الطريق و بتقول طظ في اللي قطعوا.. يبقي مفرقتش.
لو مغيرتش نفسك و اللي حواليك قبل ما تفكر تغير النظام.. يبقي مفرقتش.
لو فاكر انك لما تقف ترمي طوبة علي عساكر امن مركزي واقفين بعيد عنك 100 متر و مسكين دروع انك كدة جامد.. يبقي مفرقتش.
لو فاكر كونك في الداخلية او في الجيش يديلك حق انك تبقي علي حق علي طول.. يبقي مفرقتش.
لو بتدور علي انتماءات صغيرة علشان تحس بنفسك و فرديتك في الوقت اللي عايزين نبقي كلنا واحد.. يبقي مفرقتش.
لو بتدور علي اي موضة تطلع بيها و تبقي “كول”.. يبقي مفرقتش.
لو شايف نفسك علي طول صح و الباقي غلط.. يبقي مفرقتش.
لو مقتنع ان خالد سعيد حشاش و صايع.. او برئ و ملاك و سايب المشكلة انه اتضرب لحد الموت.. يبقي مفرقتش.
لو مقتنع ان كل اللي بينزل التحرير ثورجية و اصحاب حق.. يبقي مفرقتش.
لو شايف كل الفلول وحشين و ولاد كلب.. يبقي مفرقتش.
لو بتقول للناس تنزل و تشتمها لو منزلتش.. يبقي مفرقتش.
لو بتمنع الناس انها تنزل و تشتمهم و هما رايحين او جايين.. يبقي مفرقتش.
لو بتنزل علشان موضة.. علشان تثبت انك راجل.. علشان تحكي لصحابك.. يبقي مفرقتش.
مفرقتش..
..