التصوير

هو انا بصور ليه؟ او ليه بحب التصوير؟ مش قادر فعلا افتكر ليه اهتميت بالتصوير.. يمكن علشان اهتميت بالديزاين او الجرافكس فكان ده التطور الطبيعي؟ ولا علشان بحب الرسم لكن مابعرفش ارسم فالتصوير اسهل؟ مش فاكر بصراحة.

اول ما كنت مهتم بالتصوير حوالي 2006 – 2007 مكنش التصوير منتشر زي دلوقتي. كان قليل اوي اللي معاه كاميرا DSLR او حتي SLR و كان الكومباكت و البوينت اند شوت يعتبر غالي كمان. زي ما بعمل في اي حاجة مش قادر اجيبها او اعملها فضلت اقرأ و ادور علي النت و اقرأ كتب و نظريات و اساسيات و اتفرج علي ناس بتصور الي اخره.

سافرت و اول حاجة جبتها كانت كاميرا..بوينت اند شوت. لو كنت استنيت شوية كان ممكن اكمل و اجيب DSLR بس كنت مستعجل علشان عايز اوثق كل حاجة من اول يوم. فكرة ان اللي بيعرف يصور بيصور باي حاجة فكرة مش مظبوطة.. اللي بيعرف يصور ممكن يطلع حاجة كويسة واحدة من اي حاجة..تكوين, فكرة, زاوية…لكن انك تبقي معاك كاميرا بتفكر بدالك و عايزة تطلع الصورة مظبوطة من وجهة نظرها حاجة بتضايق اي حد فاهم تصوير و مش مجرد بيصور اوتو. بس كانت مقضية الغرض منها.

فكرة انك تروح مثلا بيست باي و تمسك كاميرا في ايدك و بعدين تسيبها و تمشي حاجة مؤلمة. و هوب فجأة بقت الـDSLR بتصور فيديو و الـD90 كانت قلبان ساعتها.

الترم التاني جاتلي الفرصة اني اروح حاجة اسمها KCC او King Career Center و اخد كورس تصوير. KCC ده تبع المدرسة و الكورسات فيه بتديلك كريدت برده. الترم الاول كنت خلصت تقريبا الحاجات اللي لازم اخدها و كان الترم التاني براحتي..كنت بروح المدرسة اللي كانت بعيدة عن ما كنت قاعد (كلام كتير و دوشة بس المفروض اني كنت ابقي في مدرسة تاني اقرب بس ما علينا) استني الاتوبيس و بعدين تقريبا ساعة او ساعة الا ربع و اوصل KCC و بعدين اخلص ارجع المدرسة في وقت الغدا و احضر الباقي و بعدين اركب الاتوبيس تاني و ارجع علي KCC لكورس التصوير. المهم في كل ده ان يومي كان بيتمحور حول قبل الكورس و اثناء الكورس و بعد الكورس. طول اليوم قبل الكورس انا بحاول افكر هاعمل ايه النهاردة..وقت الكورس بعمل. بعد الكورس انا بدور علي فيديوهات اتعلم منها التصوير بشكل عام.

Dean Paulson غالبا اعظم و اكتر واحد أثر فيا بخصوص موضوع التصوير ده. من النوع اللي مابيبخلش عليك في اي معلومة او اي طريقة او اي معدات ممكن تحتاجها او تعوزها او تستخدمها. تقريبا كل مرة بمسك فيها كاميرا بعمل نفس الحاجات اللي كان قايلنا عليها و بفتكره..فورمات الميموري كارد..الوايت بالانس..و الايزو…فاكر الاعدادات اللي كاتبهلنا علي الحيطة..فاكره و هو بيقلد مراته بضحك و بيقول “Give me the money sucker”. فاكر اول يوم و اول صورة هو صورها و هو بيشرحلنا و كانت صورتي.

و كانت اول حاجة عملت عليها ايديت تقريبا 😀

و اول صورة انا صورتها هناك..مش هاقدر انسي الفترة دي ابدا.. ولا الناس اللي كانت معايا.

المهم…نرجع للموضوع اللي نسيته اصلا..انا بصور ليه؟ 

اول ما ابتديت اصور كنت اي حاجة بصورها برفعها علي البيج علي الفيسبوك و ابقي مستني الناس تصفقلي..و مايحصلش.. و ازعل و اتضايق. و فضلت كدة فترة لحد ما قررت ان فكرة البيج بالنسبة لي مش صح. انا مش فنان علشان يبقي ليا فانز. مازلت برفع الصور علي الفيسبوك علي البروفايل بتاعي و برده ببقي مستني الناس تصفقلي شوية لاني هابقي بكدب لو قلت ان الموضوع مش مهم. مش محتاج تصقيف بس..محتاج اهتمام..نقد..محتاج اي حاجة..او حاجة معينة يمكن و انا مش عارفها…كالعادة.

لو حسبنا الموضوع هواية..حاجة بستمتع بيها.. فانا فعلا ببقي فرحان و انا بصور.. صوت الشاتر اصلا موسيقي. الصورة علي شاشة الكاميرا ليها طعم تاني. بس و بعدين؟ سؤال رخم مالوش اجابة بس في دماغي..استمتعت كام دقيقة..ساعة.. يوم و بعدين ارفع صورة الناس اللي بتجامل تجامل علي طول و خلاص. مهم اني لما اشوف حاجة بعيني و افكر في فكرة اوثقها بيها.. صورة اصورها زي مانا شايفها او عايز اشوفها..ان يشاركني اللحظة دي ناس تانية..اني اصور صورة تنقل حاجة معينة للناس التانية..مشاعر, تفكير, فعل.

العلوقية كمان مشكلة. العلوقية بسبب و من غير سبب مشكلة كبيرة. الفلوس, الهدف, العلوقية, الصحبة, التقدير, الاسم, البلد, الثقافة, التخلف, القوانين….كلام كتير, دوشة مالهاش لازمة. كلام لا هايفيد و لا هايقدم. كلام.