التصوير او التصميم بالنسبالي مش دراسة و مش وسيلة بكسب منها فلوس و لو ان نفسي اني اكون بكسب منها علشان ابقي بعمل حاجة انا بحبها و مش محتاج اركز في حاجة تانية بس مش كل حاجة بنتمناها بنلاقيها او بنعملها. للاسف انا كنت واهم نفسي كتير لكن انا فعلا لسة قدامي كتير علشان اقول علي نفسي مصور او مصمم.. اه بفهم شوية و بعرف اعمل حاجات عن غيري بس ده مش كل حاجة…
في الوقت الحالي انا مسحت الصفحات اللي كنت عاملها لنفسي علي الفيس (هايتمسحوا في خلال 14 يوم) لاني فجأة حسيت انهم حاجة بيييض اوي. مين انا علشان اعمل صفحة احط فيها الكام صورة او التصميم اللي حيلتي؟
هافضل اصور و اصمم لحد ما اموت غالبا لانها حاجة انا بحب اعملها و بستمتع بيها.. احاول احسن من نفسي علشان انا عايز ابقي كويس في الحاجة اللي بحبها علشان مجرد بحبها و بستمتع بيها مش لاي غرض تاني. لو لاقيت طريقة اكسب منها فلوس اكيد مش هامانع لان محدش مابيحبش يكسب فلوس من حاجة هو بيحب يعملها لكن مش هايبقي كل السعي ورا الموضوع ده اكتر من اني اعمل حاجة بحبها.
الصور او التصميم ممكن افضل ارفعهم علي البروفايل سواء فيس بوك او جوجل+ و الاهم اني هارفعهم علي flickr و/او deviantart.
الموضوع سهل اوي مش محتاج كل ده.. حاجة بحبها هاعملها علشان بحبها و مش مهم اي حاجة تانية 🙂