الناس اللي بتتكلم مع نفسها هي اكتر ناس مستريحة…و يمكن علشان خوفي من اني اشوف نفسي بكلم نفسي ابتديت البلوج دي بغض النظر عن اي حاجة تانية. هي فعلا مكان بخرج فيه شوية كلام و بستريح بعضه.. مش مهم مين يقراه ولا انه يبقي كلام مفهوم..المهم انه خرج. لما بدور في المواضيع القديمة في المدونة هنا بلاقي ان في الاوائل كنت بحاول اوجه كلامي لحد و بالتدريج بقيت بحاول اوجه حد لكلامي.
السنة دي مختلفة نوعا ما او انا حاسسها مختلفة..في كل حاجة. الكلية مثلا اخر سنة..مش زعلان انها اخر سنة ولا فرحان رغم ان في ناس كتير انا عارف اني مش هاشوفها تاني رغم ان ممكن ماتكونش ليا معاهم اي علاقة او علاقة قليلة اوي..بس كان في الاخر اسمنا في نفس المكان.
ناس ليا معاهم علاقة ممكن برده تبقي اخر سنة اشوفهم او اكلمهم فيها لاني في العادة مابعرفش افضل متصل باي حد بشكل كويس…انتماء للكلية او للجامعة مش هايبقي موجود رغم انه انتماء عديم القيمة..بس اهو الواحد بيتلزق.
خايف يمكن لما اخلص الكلية و ابقي معرفش انا المفروض اعمل ايه؟ يمكن. يمكن اوي كمان.
زهقت من الحاجات اللي بعملها بعد تفكير طويل…مهما كانت حلوة مافيهاش متعة…و في نفس الوقت في الغالب مابتحصلش. نفسي اقرر السفر اخد شنطة و اسافر من غير ما افكر في فلوس ولا مكان ولا اي حاجة. نفسي لما ابقي عايز اخرج البس علي طول و انزل عارف انا رايح فين…او مش عارف. بقالنا كام يوم اهو..الجو حلو..و انا اجازة.. و كل يوم بصحي علي العصر عايز انزل في الجو ده..بس مش عارف انزل اروح فين..ولا مع مين. عطية كان عايزني اروحله النهاردة..ماروحتش….رامي اتصل مرتين..غالبا علي القهوة..مش عايز انزل علي القهوة اشوف نفس الناس و نفس المنظر. مجدي بيكلمني بقاله يومين..مصلحة مش اكتر.
في فرق كبير بين اولي كلية و دلوقتي..فرق فيا..فرق في صحابي برة الجامعة..فرق في صحابي جوة الجامعة. يمكن الاربع سنين دول (او علي وشك يكملوا اربعة) كان الفرق فيهم اكبر من الـ18 سنة اللي سبقوهم. دلوقتي انا مش مبسوط زي اولي كلية مثلا..بس مرتاح اكتر. مع ان المفروض الراحة تبقي سعادة و السعادة تبقي راحة..بس مفيش حاجة اسمها مفروض.
انا فاكر لحظة معينة علي طول بتتردد في دماغي كل يوم تقريبا..يوم في الاسكا كنت مع اتنين صحابي في..ممكن نسميه مقهي مرسم جاليري مكتبة…المهم ان الكلام جاب سيرة الحب و الجنس و العلاقات و كان ردي اني مابدورش علي حاجة عبثية انا عايز حاجة مستقرة..عايز استقرار. معرفش يمكن انا كنت غلط علشان كنت صغير ولا انا لما كبرت بقيت غلط؟
في اولي كلية حاولت بشتي الطرق اقنع نفسي و اقنع الناس بحاجات انا مش مقتنع بيها..بس من وجهة نظر المجتمع هي صح…الاصح بالاصح. حاولت اقنع نفسي اني فعلا عايز استقرار..اني هاتخرج اخد كورسات و شهادات معينة و اتجوز و اخلف و الحياة وردي..لما وصلت لنقطة لاقيتني مش مستريح و مش مريح اللي حواليا..وقفت. من ساعتها و انا برتاح بارتياح الوقت.
لما تقبلت صورتي قدام الناس استريحت..المحاولات لاثبات نفسك للناس مالهاش لازمة بالعكس كانت بتخليني مابقاش نفسي بالتالي بيبقي كلامهم صح..المشلكة الوحيدة هي صورتي قدام نفسي..هي دي اللي عايز اثبتها بنفسي قدام نفسي.مش مهم ابقي فاشل, معفن, فذلوك, غبي, مابعرفش البس, بضان, كئيب, جفا العصر,….كل ده بيديلي براح اني ابقي براحتي طالما انا اصلا متشاف كدة..مافيش حاجة تخاف او تحافظ عليها.
لكن اللحظات اللي بشوف فيها انا نفسي هي اللحظات اللي بتبضني دايما.
انا في كلية كويسة احسن من ناس كتير, معايا فلوس في الغالب اكتر من معظم اللي حواليا, معنديش مشاكل في البيت او مع حد…بس وبعدين؟ مشكلة من و انا صغير اني مفيش حد اعرفه كان بيبقي معاه فلوس زي في كل الاوقات بالتالي ماينفعش نروح المكان الفلاني او نعمل حاجة معينة..علشان معهوش او معهمش فلوس..قلت عادي كل ما الواحد يكبر الموضوع هايتحسن..بس المشكلة زي ماهي. حتي الناس اللي بعرفهم جديد برده بيبقوا بنفس المشكلة..يمكن انا اللي بختار غلط او مش عارف…مشكلة.
عندي كلية 3 ايام في الاسبوع. فرحة اول ما عرفت و بعدين…ماهو مش فارقة كتير. مفيش حاجة تتعمل في باقي الـ4 ايام…ولا في حاجة تتعمل في 3 ايام الكلية لا في وسط الكلية ولا قبلها او بعدها. العيب فيا مش في الحاجة…في ناس عندهم مشكلة في الحاجات.
بس دايما الفلوس معايا في النص..لا هي قليلة زي ناس ولا هي كتيرة يتعمل بيها اللي انا عايزه..بالتالي هي متعلقة في النص. و معلقاني معاها. النص ده ابضن حاجة…في كل حاجة انا في النص…لا انا فاشل و لا ناجح..لا صايع ولا مؤدب…لا تعيس ولا سعيد…..ولا..ولا. النص ده ابضن حاجة.
لما كنت صغير شوية ايام المدرسة كان عندي مشكلة بتطاردني و هي ان صحابي مصاحبين و بنات و كدة و انا لا. فضلت المشكلة دي مأثرة فترة عليا..او يمكن كانت حاجة بشغل بيها نفسي..مادة للتفكير او هدف…ساعتها مكنتش اعرف السبب…و يمكن لازلت برده.
“علشان انت مش عايز بجد”
انا فاكر اني ساعتها كنت بقنع نفسي بكلام كتير..فن التحوير علي النفس كان كويس في الحالات دي.
طب الناس اللي بتكلمني بتكلمني ليه؟ الكام صاحب صحاب ليه؟ و اللي مش صاحب ليه برده؟
الصورة اللي فوق من مجلة بلاي بوي – اسرائيل, أبريل 2013.