معرفش ليه مابصتش في عينيها. ازاي قاومت اني اقري نظراتها؟ كنت خايف اشوف حاجة متعجبنيش..حاجة تضايقني؟ ولا مجرد استهتار بالموضوع؟
احساس ان في اتنين ماسكين دماغك واحد بيحاول يشدها ناحية الشمال علشان تشوف و التاني مثبتها في مكانها قدام و بيقولك اعمل نفسك عبيط…كل ما تمشي لقدام اكتر كل ما واحد يشد اكتر و التاني يثبت اكتر لحد ما تحس ان رقبتك هاتتكسر.
كنت بضحك علي كلام اللي معايا بس معرفش كان ساعتها بيقول ايه. يا تري شاف زي ما شفت او كان باين عليا حاجة؟.. نظرة سريعة و هو بيتكلم بتقولي لا ولا خد باله من حاجة…اقوله؟ مالهاش لازمة.
كان ممكن ادخل يمين… ممكن الف و امشي عكس..اتفرج علي اي حاجة في المحل اللي جمبي..اطلع الموبايل و اشتغل نفسي…افكار كتير كانت في دماغي في اقل من جزء من الثانية و بعدين قررت اعمل عبيط.. اعمل عبيط…اضحك ضحكة بلهاء علي كلام اللي ماشي جمبي… ماتبصش الناحية التانية و ساعدها تنجح في اللي بتحاول تعمله..ساعدها تمد خطواتها عكسك علشان تبعد عن مجال نظرك و تمحي فرصة انكم تبصوا لبعض.