متخليش حد يقولك لازم تعمل ايه
متخليش حد يقولك في مولد النبي لازم تشتري حلاوة المولد.. لازم تعمل سبوع… الخطوبة علي العروسة… البوتجاز علي العريس… لازم تذاكر كدة او كدة.. لازم تلبس بالطريقة دي.. في رمضان لازم تعمل الاكل ده.. لازم تتفرج علي ده..
لازم تجيب نيش و تملاه حلل و اطباق و حاجات علشان المنظرة.. لازم تجيب مجموع.. لازم تنام بدري او متأخر.. لازم ترجع بدري او لازم تروح بدري.. لازم تنزل او تقعد.. لازم تشتري او تغيير.. لازم تتكلم او تسكت.. لازم ترد او ماتردش.
لازم تقص شعرك.. لازم تطول دقنك.. لازم ترفع البنطلون.. لازم تنزله علشان الموضة.. لازم تتجوز.. لازم تخلف.. لازم تجيب.. لازم تعمل خطوبة و فرح تتمنظر بيهم علي الناس.. لازم تستقر.. لازم تبقي محترم.. لازم تبقي صايع علشان تجيب حقك.. لازم تسمع كلام الكبير و لازم ماتاخدش بكلام الصغير.. لازم الراجل يبقي بيمشي كلمته و لازم البنت تاخده علي قد عقله علشان هو الراجل و هي البنت.. لازم تعمل اللي الناس شايفاه صح.. ماتعملش اللي شايفينه غلط.. لازم اللي يفرحهم يفرحك.. و اللي يضايقهم يعيطك.
مفيش لازم… في انا.