الاخوان اكثر تنظيما من حيث الخرفان اللي بتطيع الاوامر و المليشيات المدربة (لو كانت مدربة اصلا ولا اسمها مليشيات) و هايقاتلوا بشراسة علشان الحكم مايروحش منهم بكل الطرق الممكنة و الغير ممكنة.
تنظموا نفسكم و تشيلوا نفس سلاحهم او تسمحوا لما الجيش يعمل انقلاب انه يسيطر تاني علي البلد لحد مانخلص من الدقون دي كلها و بعدين نبتدي حوار مع الجيش.
العسكر تفكيرهم واحد و طريقتهم واحدة و سواء صح او غلط فهم بيعملوا كدة علشان مصر و مفيش مانع لو لمصلحتهم كمان.. و دي حاجة احسن من الاخوان مييت مرة اللي عايزين مصلحتهم و مصلحة الجماعة و الاهل و العشيرة و بس.
الاخوان و المتأسلمين عموما بأساميهم و انواعهم و طول دقونهم المختلفة بالنسبة لي في اسفل القاع… اي حد تاني هايبقي احسن منهم.
في حالة ان فعلا الجيش عمل كدة و خلصنا من الاخوان او رجعوا لمكانهم الطبيعي (في الحارات الضلمة و السجون) يبقي لازم يكون في اتحاد بين الناس الفترة دي… اتحاد بجد من غير لا مصالح و لا شهرة ولا تدوير علي استقرار…الاستقرار مش موجود و مش هايبقي موجود علي الاقل لمدة 5 سنين ان لم تكن اكتر…لكن الاتحاد هايخلينا علي الاقل بعد ما الفترة دي تعدي يبقي في أمل و مستقبل احسن.
لو حصل فعلا و العسكر نزلوا… لازم يبقي في توعية للناس اللي مش فاهمة.. كل واحد مننا لازم يوعي اي حد مش فاهم او مش عارف.. التوعية مش فرض الرأي التوعية انك تدله علي الطريق اللي يقدر يفهم اختياراته كلها و يبتدي يفكر بتفكيره هو. للاسف اغلب الشعب جاهل لانه مش لاقي الاساسيات اللي يقدر يعيش بيها و يحققها قبل ما انه يفكر مايبقاش جاهل…و دي مشكلتنا كلنا و كلنا السبب فيها بشكل او بأخر.
لو العسكر نزلوا.. لو في مجلس رئاسي…. لو العفريت الاحمر….بلاش تعملوا منه اله.. بلاش تعبدوه… بلاش تبقوا خرفان و بلاش تبرير.
مهما كان هايحصل… تأكدوا ان ربنا موجود.. و بيختارلنا الصح…لكن لازم نسعي.
مهما كان هايحصل فمصر باقية و شعبها باقي بغض النظر عن تفكيره او دينه.
مهما كان هايحصل… يا ريت نتعلم.