Linux, Ubuntu, Distros

كنت ناوي اكتب الموضوع ده من زمان بس كنت بكسل او بنسي.. لكن اتسألت اكتر من مرة و حبيت اني اكتبه بقي. الموضوع اكيد منتشر علي الانترنت و في كتب كتير لكن حبيت اكتبه بطريقتي.

ايه لينكس ده؟ و ايه ابونتو؟ طيب لينكس هو ابونتو لا ده حاجة و دي حاجة؟

الموضوع سهل.. لكن محتاج الاول نفهم ايه هو نظام التشغيل... نظام التشغيل عبارة عن برنامج في اساسه هو مجرد وسيلة علشان الهاردوير او مكونات اجهزة الكومبيوتر تتواصل مع بعضها و تقوم باللي هي معمولة علشان تقوم بيه سواء الصوت, الصورة, المعالجة, الخ. بجانب البرنامج ده بيبقي في برامج تانية ليها وظيفة تانية اللي بتبقي عبارة عن السوفتوير اللي بنستخدمها او بنلعبها زي المتصفحات او سوليتير مثلا.

طيب يعني اللي هو زي ايه؟ في العادة الاغلبية عارفين الوندوز و عارفين الماك او نظام شركة أبل و اكيد بنسمع لينكس من وقت لاخر. في كتير....اي حاجة بنستخدمها غالبا فيها نظام تشغيل.. كومبيوتر, تليفيزيون, ماكينات صرف النقود او الATM و غيرهم كتير... اغلبهم بيبقي نظام التشغيل لينكس لانه مجاني.. مش مجاني بس انه ببلاش لكن ممكن اي حد يعدل او يغير فيه و يعيد توزيعه من غير ماحد يقوله بتعمل ايه و علشان طريقة برمجته و لغته كان من السهل انه يتعدل علشان ينزل او يشغل اي حاجة.

البداية ابتدت ان كان فيه حاجة اسمها Unix.. نظام تشغيل برده بس كانت معمول لشركة AT&T و بعد ما وصل انه بقي حاجة محترمة اتعمله ترخيص و بقي مش من حق اي حد انه يستخدمه.

حاجات كتير حصلت في النص....

و بعدين واحد في الجمعة قرر انه هايعمل حاجة شبه الUnix كدة علشان يلعب و علشان الدراسة... فابتدي لينوس تورفالدس Linus Torvalds ..نشر اللي هو بيعمله علي الانترنت علشان اللي مهتم زيه يلعب برده.. لكن الموضوع كبر بانه لينكس بقت من اكبر انطمة التشغيل.

بعديها ابتدت تطلع توزيعات distributions يعني بياخدو النواة او الاساس و اللي هو لينكس اللي بيشغل الكومبيوتر و الكروت و كل حاجة ليها علاقة بالهاردوير و ينزلوا معاها البرامج اللي في الاخر بتعمل شكل التوزيعة بشكلها النهائي. البرامج دي برده مجانية و مفتوحة المصدر يعني اي حد ممكن يعدل فيها و يطورها و يعيد توزيعها و ده اللي بيحصل في التوزيعات لما بتختار برنامج مثلا معين زي برنامج لتشغيل الميديا.. لو التوزيعة كبيرة او حتي صغيرة بيبقي في مطورين مهتمين انهم يطوروا البرنامج بشكل اكبر.

التوزيعة بيتغير فيها حاجات كتير من توزيعة للتانية لكن الاساس واحد و هو لينكس. كل توزيعة بيبقي ليها مطورين في الغالبية العظمي بيعملوا اللي بيعملوه من غير مقابل لان اغلب التوزيعات مجانية و مفتوح المصدر و ممكن اي حد ينزلها بشكل قانوني و ينسخها و يوزعها علي اصحابه او حتي الناس في الشارع بشكل قانوني.

مفيش توزيعة احسن من الكل.. كل حاجة ليها مميزاتها و عيوبها و في النهاية اللينكس اصلا معمولة علشان كل واحد غير التاني. كل توزيعة معمولة لهدف معين و بالتالي البرامج اللي بتنزل معاها بتبقي موجهة للهدف ده.

من امثلة التوزيعات دي

Ubuntu

Fedora

Mint

RedHat

OpenSuse

Arch Linux

و في غيرهم بالالاف.

يعني ابونتو توزيعة مبنية علي اللينكس و زي ما قولنا :-

Linux distributions include the Linux kernel, supporting utilities and libraries and usually a large amount of application software to fulfill the distribution's intended use.

طيب ليه ابونتو مشهورة؟ علشان ابونتو من اول ما طلعت و هي موجهة للمستخدم العادي فبتحاول انها تكون غير معقدة علشان الكل يعرف يستخدمها من اول اللي مش فاهم في الكومبيوتر اصلا و عايز بس يعمل حاجات اساسية لحد مثلا المبرمجين. اول ما طلعت كانت بتعمل اكتر من توزيعة من نفسها او بتدعم اكثر من توزيعة من نفسها ببيئة مختلفة (بيئة رسومية) زي KDE و Gnome و غيرهم و لحد دلوقتي اي حد ممكن يغير في اي حاجة من اي حتة لاي حتة.

ابونتو مدعومة بشركة كبيرة صاحبها ملياردير بالتالي في دعم وراها غير التبرعات و المساعدة اللي بتطلع من المجتمع ذات نفسه في تطويرها.

ابونتو بتنزل نسخة كل 6 شهور في شهر 4 و شهر 10 و في نسخ بتبقي مدعومة لوقت اطول و مستقرة اكتر اسمها LTS و باقي النسخ بتبقي زي مراحل للتطوير.

ابونتو مؤخرا كشفت عن انها هاتنزل نظام تشغيل للموبايلات و كشفت امبارح عن اخر للاجهزة اللوحية او التابلتس... الفكرة ان النظام واحد مع اختلاف التحكم فيه علشان يناسب الاجهزة المختلفة دي.

لو قعدت اتكلم لحد مااموت مش هاعرف اشرح كل حاجة لا بالتفصيل ولا حتي سريعا. انا كتبت لمحة بسيطة وهاكتب تحت اماكن تانية لو حد مهتم ممكن يقرأ اكتر.

http://en.wikipedia.org/wiki/Linux Linux

http://en.wikipedia.org/wiki/Linux_distribution Linux Distrobution

http://www.ubuntu.com Ubuntu

http://www.linuxmint.com/ Linux Mint

http://fedoraproject.org/ Fedora

http://www.redhat.com/ Red Hat

https://www.archlinux.org/ Arch Linux

http://distrowatch.com/ Distro Watch (news about the distros)

http://www.osalt.com/ Os Alt (Find open source software alternatives to well-known commercial software)

http://en.wikipedia.org/wiki/Desktop_environment Desktop Environment (بيئة رسومية)

http://en.wikipedia.org/wiki/Open_source Open Source