حاجات

اكتشفت ان فعلا من الاحسن ان الواحد يبقي لوحده...مايعرفش حد...من الاحسن ليا. مش مهم مين يموت او يتعب. يمشي او يجي. مش مهم.
المشكلة هنا تكون في انك لما تحس انك محتاج حد انك ماتحسش...و ده بالممارسة ممكن. محتاج تدريب...تعب مش مهم. المهم....معرفش اصلا ايه المهم.
نقدر نقول ان الكلام ده وقتي او لحظي و هايعدي؟ فشخ..

بدعي، بتمني...كل الكلام ده...ان موضوع اسلام يتم علي خير...يتم حتي بشكله الحالي و يفضل كدة..هايشيل ضغط من عليا..كبير او صغير بس ضغط.

امبارح طلعت الاوض اللي فوق. الاوضة اللي مافيهاش ردم سهل تتنضف..قلت ممكن انضفها و اعملها قاعدة مؤقتا و لو اتطورت بعد كدة يبقي كويس..بس و بعدين؟ هاعملها قاعدة اقعد فيها لوحدي...مانا قاعد في اوضتي لوحدي محدش بيضايقني ولا بيسمع انا بفكر في ايه. و بعدين؟ مالهاش لازمة تقريبا.

هو الواحد بيكبر بان خبرته بتزيد فشخصيته بتتغير فيبقي واحد احسن او اسوأ...طب ايه اللي هايخلينا ناخد وقفة مع النفس و نفكر و ناخد خبرة و كمان نغير من نفسنا؟ هي اكيد الحاجات دي..الوقفات دي. الاشخاص اللي بتعرفهم و اللي بتعرفهم اوي و تسيبهم. او يسيبوك.

انا بحاول الاقي حد مكمل في اني اعرفه مش لاقي. معرفة عابرة موجود. غير كدة لا. في كي جي و اوائل ابتدائئ كدة كان كله مرتبط بالمدرسة...في المدرسة بتقابل "صحابك" و بعد ما المدرسة تخلص اروح. لما كبرنا شوية...كنت انا اللي مش لاقي مكان ابقي مع حد...لا انا صايع و دايس ولا دودة مذاكرة و لا عبيط و دي كانت المجموعات في المدرسة. علي اواخر ابتدائي..غالبا في خامسة ابتدائي كنت مرتبط بالسايبر و كان ساعتها قليل اوي لما تلاقي طفل في سايبر او بيفهم اصلا كومبيوتر..كل اللي اتصاحبت عليهم كانوا كبار. في الاول عادي كزبون و بعدين كصحاب. اول مرة ابات برة البيت لوحدي كان في السايبر (اللي علي اول الشارع) و كانت وجهة نظر بابا اني ماخرجش من السايبر و مارجعش الا الصبح بعد 7 علشان لو رجعت بليل ولا الفجر الناس تقول ايه؟
الفترة دي كنت مرتاح فيها. جدا.
الزن ابتدا من كل الناس حواليا ني لازم اصاحب ناس في سني..جار و مدرسين و غيره..نفضتلهم لحد ما السايبر اتقفل..بقيت لقيط. كان معايا طول الفترة دي ابن خالتي اللي ساكن تحت. كنت فاكر برده اننا ممكن نفضل كدة لحد ما نموت. بس محصلش.
ايدي اتكسرت...مرمي في البيت. سنة في التانية اتشقلطت مع صحاب المدرسة "الصايعين" من غير برده ما ابقي صايع. دول اللي طلعت بيهم من اصحاب الطفولة. بس بالتدريج مابقاش. مابقتش او ماباقوش.

سفر؟ و اللي سافرت معاهم؟ من بعيد لبعيد. شوية مابستريحش و انا معاهم و الباقي مابستريحلوش.

الجامعة :D  حلوة الجامعة جدا و الكلية.

المهم دلوقتي....برده مش عارف.