التستور
انا معصرتش علي نفسي لمونة ولا وصلت اني اقول شفيق احسن. كان قراري بالمقاطعة في الجولتين مبني علي اساس ان المشاركة في الباطل حتي لو كان الغرض منه حق فهيفضل علي طول باطل.
بالنسبة لي انتخاب رئيس من غير دستور عامل زي تعيين مدير للشركة من غير مايبقي في شركة اصلا. المجلس العسكري بغبائه الشديد و تكبره انه الكيان الوحيد الي فاهم كل حاجة و اكتر مؤسسة وطنية في مصر ركب دماغه لحد ما وصلنا للمرحلة اللي احنا فيها دي.
بكرة الاستفتاء علي الدستور بتاع ام حمادة... الدستور اللي مش دستور.. دستور مجلة ميكي.
انا غالبا لو قعدت مع الناس اللي بقعد معاهم علي القهوة و قررنا نعمل دستور هانبقي احسن من اللجنة دي و الدستور هايبقي احسن من الدستور ده... ده الناس اللي علي القهوة مثقفين (شهاديا و عمليا) عن شلاليط اللجنة التأسسية.
لما رئيس الجمهورية يطلع يقولك وافقه عليه و بعدين نبقي نغير اللي في مشاكل بعدين... ده يبقي اسمه ايه؟
لما رئيس الجمهورية يقولك لو النتيجة ﻻ يبقي اللي هايجي بعد كدة هايبقي محصن... ده يبقي اسمه ايه؟
لما رئيس جمهورية يسيب الناس تموت برا قصره و هوا قاعد مستخبي تحت الكرسي و بعدين يطلع يقولك عربية الرئاسة تضررت.. ده يبقي اسمه ايه؟
لما رئيس جمهورية من ساعة ما مسك و هو بيطلع قرار و يلغيه..سواء كان صح او غلط فده لا يدل اﻻ علي انه انسان جاهل بدينه و بشعبه و بقوانينه و دستوره و شرعيته.
لما حكومة اخوان و مجلس اخوان و حزب اخوان يقولك علي المعارضة فلول.. عملاء.. ملحدين...علمانيين... ليبراليين...مسيحين!!! و يضربوا اللي يضربوه و يسحلوا اللي يسحلوه و يقولك احنا اتضربنا و كل اللي بيموت من عندنا و الموضوع يبقي عادي... مستني ايه من استفتاء؟
مستني ايه من استفتاء بنعم او بـلا؟
مستني ايه من خرفان بتصوت و هي مش فاهمة علشان سيادة المرشد قالهم كدة؟
مستني ايه من شعب لسة مش لاقي الفرصة انه يحاول يفهم بس بيلاقي واحد بيقوله لو صوت بـلا هامسحوا الاسلام بأستيكة من الدستور؟
مستني ايه من شعب اغلبه بيشتغل اليوم بيومه و مش همه الا انه يلاقي اكل لعياله في اخر اليوم؟
مستني ايه من قيادات عجوزة راح عليها الزمن بتفكر بنفس التفكير و نفس الطريقة اللي اتولده بيهم من 50 سنة؟
مستني ايه؟
اللجنة التأسسية باطلة.
الدستور و مسودته باطلة.
الاستفتاء و الاصرار عليه بدستور ام ترتر باطل.
رئيس جمهورية عايز يبقي فرعون و بعدين لما يلاقي الشعب صاحيله يقولك خلاص هابقي فرعون بعد شوية باطل.
مرسي ابن العياط المفروض يكون بيتحاكم دلوقتي بخروجه علي الشرعية القانونية و الشعبية... وبيتحاكم بنفس التهم الموجهة لمبارك.
سواء كنت صح او غلط.. سواء كان قراري بالمقاطعة يصب في مصلحة طرف من الاطراف فانا مش هانزل اشارك في حاجة غلط باسم الشرعية و الديموقراطية و هم مش فاهمين يعني ايه شرعية و يعني اي ديموقراطية.
مش هانزل اصوت في استفتاء دعي اليه رئيس بدون شرعية... مش رئيس اصلا.
محدش يخيرني بين "قتل واحدة" او "اغتصابها" و يقولي شرعية و ديموقراطية و رأي الاغلبية.... مش هشارك في غلط حتي لو كنت انا غلط... ضميري يكون مستريح اني اخترت القرار الصحيح بالنسبة لي و الاصلح للبلد بعدم المشاركة في شئ غير شرعي دعي اليه استبن الحنكلولو.
Comments
Post a Comment