اناني يمكن..
هو يمكن علشان انا قليل جدا او نادرا لما بطلب حاجة من حد علشان كدة بتضايق لما حد بيطلب مني حاجة؟ بحاول افتكر في مرة كلمت فيها اي حد اعرفه من صحابي او معارف و طلبت منه حاجة في التليفون.."الو ازيك ايه يبني انت فين و عامل ايه..بقولك ايه انا عايز...." عمري ما عملتها. عمري ما فكرت اعملها.
اسلام كذا مرة يتضايق مني في الموضوع ده.. هو باقتناعه ان الصديق لازم يطلب من صديقه اي حاجة لما يكون عايزها..فلوس خدمة اي حاجة مش مهم المسمي او القيمة لكن لازم يطلب.. و انا لما ببقي عايز اشتري حاجة و عارف ان فلان بيبيع او عنده مابرضاش اكلمه او اساله علشان مايفكرش فيها اني بطلب منه بحكم الصداقة حاجة.
مش بتضايق لما يكون حد بيكلمني كل يوم او بشوفوا كل يوم و يطلب مني حاجة.. عادي بالنسبة لي. لكن لما حد مايتكلمش اﻻ كل ما يبقي عايز حاجة..بتضايق جدا. في أغلب الاوقات مابردش و بنفض.
انا ندل؟ ايوة عادي.
اناني؟ متربي لوحدي و وحيد..ايوة اناني.
صاحب فاشل؟ ايوة و بقول كدة من زمان.
ليه ماتكلمنيش اﻻ لما تكون عايز حاجة... او بتبقي محتاج حاجة معينة فاجي انا في بالك؟ ليه ماتكلمنيش اﻻ لما تكون عايز تشوفني انا. عايز تقعد معايا. عايزنا نخرج او نعمل حاجة سوا.
ليه يبقي نظرتك اننا في الكلية بناخد غرض و خلاص...تصاحب ده علشان بيكتب ورا الدكتور.. و دي علشان تعرف علي صاحبتها... وده علشان معاه عربية فبيوصلك بدل ما تركب ميكروباص. و ده علشان معاه فلوس و بيجيب سجاير فبدل ما تجيب انت تاخد منه كل شوية. انت فاكر انك شاطر و فهلوي و بتاخد مصالحك من الناس...بس الحقيقة انت مجرد فطر..مجرد كائن تطفلي بتعيش علي قفا الاخرين..يعني في النهاية انت معرص.
لو مش عايز اكلم حد...ببساطة مش هاكلمه لكن مش لازمة اصطنع اي ابتسامة او اي كلام معاه. لو عايز حاجة من حد ما اروح اقوله انا بكلمك علشان كذا وكذا و لو مش موافق..اديك عرفت. ليه مايبقاش الهدف من الصحاب اني بس عايز ااقضي وقت معاك..استفدت في الوقت ده بأي حاجة زيادة فده علشان انا معاك..لكن مابقاش معاك علشان استفيد.
مش معني اني معايا كاميرا و بحب التصوير اني هامشي وراك اصور كل حاجة بتعملها.
مش معني اني بفهم شوية في الكومبيوتر يبقي هابقي اللي بتكلمه لما تعوز تصلح حاجة.
مش معني اني في كلية المفروض فيها مزز مع اني معرفش ولا واحدة..انك تلزقلي لمجرد انك عايز تشوف واحدة او تظبط مع مزة.
مش معني اني بقرأ و باشتري كتب يبقي اديلك كتبي.
مش معني ان بفهم في حاجة اني ممكن ببساطة افهمهالك بسهولة...الفهم حاجة و اني افهم حاجة تانية.
اليوم اللي هاكلم فيه حد علشان مجرد عايز منه حاجة...هابقي نقصت كتيير اوي. هابقي معرص.
Comments
Post a Comment